Dira na Dhamira

DIRA

Dira ya Halmashauri ya Manispaa ni kuwa moja kati ya Halmashauri bora nchini yenye uwezo mzuri wa kutoa huduma bora na endelevu kwa wadau wake wote ifikapo mwaka 2025

MAONO

Maono ya Halmashauri ya Manispaa ya Lindi ni kuongeza uwezo wa jamii mchanganyiko katika kuendeleza utawala bora, ukuaji wa uchumi, maisha bora na mazingira endelevu.

MALENGO

Lengo Kuu

Lengo kuu la Halmashauri ya Manispaa katika kuandaa mpango mkakati wake ni kuhakikisha maisha bora ya wananchi wa Manispaa ya Lindi kwa kutoa huduma bora zaidi za jamii ili kupanua wigo katika kuvutia uwekezaji wa sekta mbalimbali zilizopo Manispaa ya Lindi.

MALENGO MAHUSUSI

Ili kufanikisha lengo kuu, Halmashauri ya Manispaa ya Lindi imejiwekea malengo mahususi kama ifuatavyo:-

Kuboresha huduma za jamii na kupunguza maambukizi mapya ya VVU

• Kiwango ya maambukizi ya virusi vya ukimwi katika Manispaa ya Lindi ni asilimia 5.9 na kundi kubwa lililoathirika ni la umri kati ya miaka 18 na 45. Hili ni kundi muhimu katika uendeshaji wa shughuli za kiuchumi katika jamii ya Manispaa ambalo huathiri nguvu kazi. Hivyo mpango mkakati wa Halmashauri utazingatia shughuli za kupambana na kupunguza maambukizi mapya ili kuokoa maisha ya wananchi.

Kuendeleza utekelezaji wa mkakati wa taifa wa kupambana na kuzuia rushwa 

• Rushwa ni suala linaloendelea kukua katika taasisi mbalimbali nchini. Rushwa hupunguza kiwango cha uwajibikaji na uwazi katika utendaji kazi. Halmashauri ya Manispaa ya Lindi kama taasisi ya Serikali jukumu lake kuu ni kutoa huduma za jamii katika eneo lake la utawala katika njia zilizo halali na za kisheria. Halmashauri itahamasisha jamii katika kupinga na kutokomeza rushwa na kuhakikisha utawala bora.

Kuboresha na kuongeza upatikanaji wa huduma za jamii

• Halmashauri huwajibika kutoa huduma za jamii zilizo bora na kuhakikisha zinapatikana kwa wananchi wake. Mpango mkakati huu utahakikisha unatolea ufumbuzi wa masuala nyeti katika huduma za jamii ili kufanikisha lengo kuu.

Kuimarisha utawala bora na huduma za kiutumishi

• Utawala bora ni suala muhimu katika mafanikio ya jamii yoyote ile kwa kuwa huhusika katika kutoa maamuzi, utawala wa sheria, usimamizi wa rasilimali watu, uwazi, uwajibikaji, ufanisi, ufasaha, usawa na jinsia. Halmashauri ya Manispaa itatekeleza mpango mkakati wake kwa kuzingatia taratibu na kanuni za utawala bora ili kufanikisha mahitaji ya wananchi wake waliopo na wajao.

Kuboresha utayari wa kukabiliana na matukio na majanga

• Utayari wa usimamizi wa matukio na majanga ni muhimu sana kwa Halmashauri katika kupunguza gharama zinazojitokeza wakati wa majanga yanapotokea kama moto, magonjwa ya mlipuko na maporomoko ya ardhi.

Kuongeza kiwango na ubora wa huduma na miundombinu ya kiuchumi

Miundombinu ya kiuchumi ni kigezo muhimu katika ukuaji wa uchumi na maendeleo katika uchumi wowote duniani. Halmashauri inalazimika kuboresha huduma na miundombinu ya kiuchumi ili kukuza uchumi wa wananchi wa Manispaa ya Lindi kwa kutumia vizuri rasilimali zake zilizopo. Ukuaji wa uzalishaji katika kilimo na mifugo, uvuvi, maliasiri, biashara na viwanda itasababisha mabadiliko katika kiwango cha ukuaji wa uchumi wa Manispaa ya Lindi.

Kuboresha usimamizi wa maliasiri na mazingira

Halmashauri ya Manispaa ya Lindi inaamini kuwa popote pale duniani, uchumi endelevu hutegemeana na usimamizi na uhifadhi endelevu wa mazingira. Ukuaji wa uchumi hutegemea mazingira yake, hivyo Halmashauri itahakikisha usimamizi mzuri wa mazingira ya rasilimali na maliasiri zilizopo na kuboresha usafi na mazingira.

Kuboresha mipango shirikishi, ufuatiliaji na tathmini ya miradi

Mzunguko wa mipango kuanzia ngazi ya chini ni njia inayotumika katika kuweka mipango na bajeti ya Serikali za Mitaa. Halmashauri ya Manispaa itahakikisha jamii inashiriki kikamilifu katika kuibua na kuweka mipango ya maendeleo. Ufuatiliaji na tathmini nzuri ya miradi ni nguzo ya utekelezaji mzuri wa miradi na Halmashauri itahakikisha ufuatiliaji unafanyika kikamilifu na kwa ufanisi.

Kutokana na malengo mahususi ya Halmashauri yaliyojadiliwa hapo juu, kila sekta/idara katika Halmashauri ya Manispaa imeweka malengo ya utekelezaji wake ili kufanikisha lengo kuu la Halmashauri. Kila sekta/idara itakuwa na malengo yake bila kuingiliana kati ya idara na idara ili kuongeza uwajibikaji. Hivyo idara zimejiwekea malengo ambayo yameainishwa katika sura ya nne kwa utekelezaji wa lengo kuu la Halmashauri.