WANANCHI KIKWETU WASAINI MIKATABA YA ULIPAJI FIDIA KUPISHA UJENZI WA CHUO CHA BAHARI.

Imetumwa: February 10th, 2026

Wananchi wa mtaa wa Kikwetu, kata ya Mbanja katika Manispaa ya Lindi, wameanza rasmi zoezi la kusainisha mikataba ya ulipaji fidia ili kupisha ujenzi wa Chuo cha Bahari (DMI – Ekali 90), mradi mkubwa wa elimu unaotarajiwa kuleta maendeleo ya kijamii na kiuchumi katika eneo hilo.

Zoezi hilo limesimamiwa na Halmashauri ya Manispaa ya Lindi, huku fedha za mradi wa fidia zikitolewa na Chuo cha Bahari Dar es Salaam (DMI). Jumla ya kiasi cha shilingi milioni mia mbili sabini na sita laki tatu elfu nane mia nne ishirini na nane na senti kumi na moja(276,308,428.11) kimetengwa kwa ajili ya kulipa fidia kwa wananchi waliopisha maeneo yao.

Akizungumza wakati wa zoezi hilo, Msimamizi wa Mradi kutoka Chuo cha Bahari Dar es Salaam (DMI), Bw. Victor Kilindo, amesema kuwa zoezi hilo limezingatia sheria, taratibu na haki za wananchi.

“Tunashukuru ushirikiano wa wananchi wa Kikwetu. Mradi huu ni muhimu kwa maendeleo ya elimu ya bahari, na tumefanya kila hatua kwa uwazi na kwa kufuata sheria zote,” alisema Kilindo.

Kwa upande wake, Mthamini kutoka Manispaa ya Lindi, Ndg. Mhaja Msuka, amesema tathmini ya mali za wananchi ilifanyika kwa umakini mkubwa ili kuhakikisha thamani halisi inalipwa.

“Tumefanya tathmini ya ardhi na mali kwa kuzingatia viwango vya kitaalamu ili kuhakikisha kila mwananchi analipwa fidia stahiki,” alisema Msuka.

Mwanasheria wa Halmashauri ya Manispaa ya Lindi, Bi. Alice John, amebainisha kuwa mikataba yote ya fidia imesomwa na kufafanuliwa kwa wananchi kabla ya kusainiwa ili kuepusha migogoro ya baadaye.

“Halmashauri imehakikisha mikataba yote inaeleweka vizuri na wananchi wameridhia kwa hiari yao kabla ya kusaini,” alisema Alice John.

Aidha, Mkuu wa Chuo cha Bahari, Tumaini Gurumo, ametajwa kufanya malipo ya uthibitishaji wa mikataba ya fidia kwa wakili, hatua iliyolenga kuongeza uhalali na usalama wa kisheria katika mchakato mzima wa malipo.

Wananchi wa Kikwetu wamepongeza hatua hiyo wakisema ujenzi wa chuo hicho utachochea maendeleo, kuongeza ajira na kukuza shughuli za kiuchumi katika Manispaa ya Lindi.