Watumishi wa ajira mpya wapatiwa mafunzo ya awali

Imetumwa: August 13th, 2022

Halmashauri ya Manispaa ya Lindi imetoa mafunzo ya awali kwa watumishi wa ajira mpya siku ya jana tarehe 12/08/2022 katika ukumbi wa DDC.  Mafunzo hayo ni katika kutekeleza waraka wa utumishi Na. 5 wa mwaka 2011 unaotaka watumishi wanaoajiriwa kwa mara ya kwanza kupatiwa mafunzo ya awali ndani ya miezi mitatu tangu kuajiriwa.

Mafunzo yalifunguliwa na Katibu Tawala wa Wilaya ya Lindi Ndg. Mbwana Kawangwa ambaye alikuwa akimuwakilisha Mkuu wa Wilaya ya Lindi Mhe. Shaibu Ndemanga.

Akizungumza katika mafunzo hayo, Ndg. Kawangwa aliwapongeza watumishi hao kwa kuajiriwa na aliwasihi wa mshukuru sana Mungu na kumuomba awaongoze katika utumishi wao. Pia alimshukuru Rais wa Jamhuri wa Muungano wa Tanzania Mhe. Samia suluhu Hassan kwa kutoa ajira nyingi.

Aliwataka watumishi hao wakatimize majukumu yao kwa mujibu wa sheria, taratibu, kanuni na miongozo. Pia aliwasihi wakaimarishe ulinzi na usalama, kusimamia miradi, kutatua kero za wananchi pamoja na kushiriki na kuhamasisha zoezi la sensa litalofanyika Agosti 23 mwaka 2022.

Naye Mkurugenzi wa Manispaa ya Lindi Ndg. Juma Mnwele aliwakaribisha na kuwapongeza watumishi hao. Aliwataka wakafanye kazi kwa weledi na kutii na kuheshimu viongozi pamoja na wananchi wanaoenda kuwatumikia kwa ujumla.

Halmashauri ya Manispaa ya Lindi ilipata mgao wa watumishi 60 wa kada ya Afya na 55 wa kada ya Elimu. Na pia ilipata kibali cha kuajiri watendaji 15, makatibu mahsusi 3 na maafisa usafirishaji 4.